Friday, 22 March 2013

ውያኔ በተዋሕዶ ሃይማኖታችን ላይ ያለማቋረጥ ያካሄደውን ጦርነት በተመለከተ በኮለምበስ ኦሃዮና አጎራባች ከተሞች ከምንገኝ የተዋሕዶ ልጆች የተሰጠ የአቋም መግለጫ


ውያኔ በተዋሕዶ ሃይማኖታችን ላይ ያለማቋረጥ ያካሄደውን ጦርነት በተመለከተ በኮለምበስ ኦሃዮና አጎራባች ከተሞች ከምንገኝ የተዋሕዶ ልጆች የተሰጠ የአቋም መግለጫ

መጋቢት 13 ቀን 2005 ዓ.ም. ( March 22, 2013 )

በስመ አብ፣ ወወልድ፣ ወመንፈስ ቅዱስ አሀዱ አምላክ፤ አሜን።

“እውነትን በግልጥ የማይናገር ሰው ሁከትን ይፈጥራል…”
መጽሐፈ ምሳሌ 10፥10
“የሐሰት ዕድሜ አጭር ነው፤ እውነት ግን ለዘላለም ትኖራለች። ”
መጽሐፈ ምሳሌ 12፥19
ሀገራችን ኢትዮጵያና ጥንታዊው ሃይማኖታችን ኦርቶዶክስ ተዋሕዶ ክርስትና ለረጅም ዘመናት ሳይነጣጠሉ ተቆራኝተው በአንድነት የኖሩ መሆናቸውን የታሪክ ማኅደር በሰፊው ይመሰክራል፡፡The Ethiopian Orthodox Union church
በሀገራችን አንድነት፤ በሕዝባችንም ነፃነት እንዲሁም በቅድስት ቤተክርስቲያናችንና በተዋሕዶ ሃይማኖታችን ጽናትና ጥንካሬ ላይ በተለያዩ ጊዜያት ልዩ ልዩ ፈተናዎች ቢገጥሙም፤ በቆራጥ የሃይማኖት አባቶቻችን ጽኑ አመራር፣ ተጋድሎና መስዋዕትነት የተጋረጡባቸውን መከራ እያለፉ ሃይማኖታችንን ጠብቀው፤ የሀገራችንና የሕዝባችንም አንድነትና ነፃነት ሳያስደፍሩ አቆይተውልናል፡፡
ፀረ-ኢትዮጵያዊና ፋሽስቱ ወያኔ ከሽፍትነት ወደ ገዥ ቡድንነት ተሸጋግሮ ሥልጣን ላይ ከወጣበት 21 ዓመታት ጀመሮ የጥፋት እጁን ዘርግቶ የሀገራችንን ሕልውና አደጋ ላይ ለመጣል እየተፍጨረጨረ ከሚገኝባቸው በርካታ አጀንዳዎች መካከል ከፍተኛውን እጅ የያዘው የኢትዮጵያ ኦርቶዶክስ ተዋሕዶ ቤተ ክርስቲያንን ለማጥፋት እንደሆነ ይታወቃል። ይህንን ተግባር እውን ለማድረግ ከጅምሩ ሕገ-ቤተክርስቲያን አፍርሶ፣ ሕጋዊ ፓትርያርኩን ከመንበራቸው አውርዶ ለስደት ከመዳረጉ በላይ የዘር መድልኦ ተልዕኮውን በመዘርጋት ቤተክርስቲያኒቱን በቁጥጥሩ ሥር አውሎ የታሪክ ቅርሶቿን በማጥፋት ላይ ይገኛል፡፡
ከዚህ በፊት በክርስትና ሃይማኖታችን ላይ ከደረሱት ጥፋቶች፤ ከዮዲት ጉዲት ሆነ ከግራኝ መሐመድ የመከራ ዘመን ይህ አሁን ያለንበት ወቅት አጅግ ላቅ ያለ መከራ የተጋረጠበት፤አጅግ በረቀቀ የጥፋት መረብ ውስጥ ሕዝበ ክርስቲያኑን ለማጥመድ የተንኮል ሴራ የተሸረበበት፤ ቤተክርስቲያንን ለማጥፋት በታሪካዊ ጠላቶቻችን ለዘመናት ሲጠኑ የኖሩ እቅዶችን ተግባራዊ በማድረግ ፋሽስቱ ወያኔ ፀረ-ኢትዮጵያና ፀረ-ተዋሕዶ ድርጊቱን በግልጽ እየፈጸመ ይገኛል።ለአስረጅነት ለመጥቀስ ያህል መናኞችና ባሕታውያን በጾም በፀሎት የሚኖሩባቸው ታሪካዊ ገዳሞቻችንን እንደ ዝቋላ፣ አሰቦት ወዘተ. . . የመሳሰሉት ለማጥፋት ሆን ተብሎ በእሳት ማጋየት፤ ታላቁን ዋልድባ ገዳምን በልማት ስም ይዞታውን በመቆጣጠር የቅዱሳን አባቶቻችን መካነ-መቃብር ማረስ፤ መናንያን መነኮሳት አባቶችን እያንገላቱ ማሰር፤ እንዲሁም በርከት ያሉትን ከገዳማቸው በማፈናቀል ማባረርን የመሳሰሉት ይገኙበታል።
በኮለምበስ ኦሃዮና አጎራባች ከተሞች ከምንገኝ የተዋሕዶ ልጆች የተሰጠ የአቋም መግለጫ ገጽ 2 ፀረ-ኢትዮጵያዊና ፋሽስቱ ወያኔ ኢትዮጵያን በ1983 እ.ኢትዮ.አ. ከተቆጣጠረ በኋላ የችግሩ መንስዔና የሁኔታዎች ሂደት እንዴት እንደነበሩ በአጭሩ እንመልከት፥
1. የችግሩ መንስዔ፥
ወልደ ኀጉሉ ( ለአጥፊነት የተፈጠረ ) የኢትዮጵያ ጠላት ፋሽስቱ ወያኔ ኢትዮጵያን በገዥነት በተቆጣጠረበት ጊዜ ተግባሩ አድርጎ የወሰደው 17 ዓመት በርሃ በነበረበት ወቅት ሲያውጠነጥን የቆየውን ኢትዮጵያንና የኦርቶዶክስ ተዋሕዶ ሃይማኖታችንን ለማጥፋት፤ እንዲሁም ከሃይማኖታችን ጋር ለሺህ ዓመታት ታሪካዊ ቁርኝት ያላቸው ሕዝባዊ ቅርሶቻችንን የማውደም ተልዕኮውን መወጣት ነበር። ይህንን እቅድ ለመፈጸም ይቻል ዘንድ በርሃ ሳለ ጣምራ ገጸ-ባሕሪ የተላበሱ፤ በጎሰኝነታቸው የሚታወቁ፤ ለሚያራምደው የጎሳ ፖለቲካ ምቹ የሆኑና የተዋህዶ ሃይማኖት ትምህርት የቀሰሙ ግለሰቦችን መልምሎ
አሰለጠነ።
ፋሽስቱ ወያኔ ኢትዮጵያን በአገዛዙ ሥር ሲያስገባ እነዚህን ሃሳዊ-መሢህና የበግ ለምድ የለበሱ ተኩላዎች የሃይማኖቱ መሪዎች አድርጎ ሾመ። በዚሁ መሠረት የጥፋት እጁን በኦርቶዶክስ ተዋሕዶ ሃይማኖታችን ላይ ዘረጋ። በቁጥጥር ሥር ያደረጋቸውን የብዙሃን መገናኛ አውታሮች በመጠቀም የሕገ-ቤተክርስቲያን ደንብ ተሟልቶና ተጠብቆ በሥርዓት የተመረጡትን ሕጋዊ ፓትርያርክ ብፁዕ ወቅዱስ አቡነ መርቆሬዎስ ርዕሰ ሊቃነ ጳጳሳት ፓትርያርክ ዘኢትዮጵያ ላይ የሀሰት ፕሮፓጋንዳ መንዛቱን ተያያዘው። የስውር ታጣቂ ኃይሉንም በመጠቀም አስገድዶ ከመንበራቸው አወረዳቸው። በምትካቸው የአድዋ ተወላጅና የወያኔ አባል የነበሩትን አባ ገብረመድህንን (ጳውሎስ) ሾመ።
በዚህ የተነሳ ሕገ ቀኖና ፈረሰ።ሥርዓተ ቤተክርስቲያንም ተጣሰ። ለመጀመርያ ጊዜ በሃይማኖታችን ታሪክ ውስጥ ሁለት ሲኖዶሶችና ገለልተኛ ቤተክርስቲያን ተከሰቱ። ይኸም በስደት የሚገኘው ሕጋዊው ቅዱስ ሲኖደስ፤ የወያኔ ተቀጥላ የሆነው የአዲስ አበባው ሲኖዶስ እና ከሁለቱም ሲኖዶሶች ውጭ ነን የሚል ገለልተኛ ቤተክርስቲያን።
2. የእርቀ ሰላሙ ሂደትና ፍጻሜ፥
የሕገ-ቤተክርስቲያን (ቀኖና) መጣስ የኢትዮጵያ ኦርቶዶክስ ተዋሕዶ ቤተክርስቲያንን ከሦስት(3) ከፍሎ፤ ታይቶና ተሰምቶ በማይታወቅ ሁኔታ በዘር ዙርያ ባጠነጠነ ባሕሪው ቤተክርስቲያናችንን ችግር ላይ ጣላት፤ አንድነቷም ተናጋ፤ምዕመናን ተስፋ ቆረጡ።
ይህ ጉዳይ በከፍተኛ ደረጃ ያሳሰባቸው የተዋሕዶ ልጆች ሁለቱን ሲኖዶሶች ለማስታረቅ ሁለት የሰላም ስብሰባዎች ጠርተውና አካሂደው ጉዳዩ በእንጥልጥል ላይ እንዳለ፤ እግዚአብሔር ሁኔታውን ለማመቻቸት ሲል አባ ገብረመድህንን (ጳውሎስ) ሳይታሰብ ወደ ማይቀረው ዓለም ወሰዳቸው። ይህ ሁኔታ ለሰላሙ በር ከፍቶ ታላቅ እድል ሰጠ። በሀገር ቤትና በውጭ ሀገራት ያሉት ምዕመናን የቤተክርስቲያን አንድነት ይመጣል ብለው ታላቅ ተስፋ አደረጉ። የሰላም ኮሚቴውም እርቀ-ሰላም ለማምጣት ከማንኛውም ጊዜ በላይ ተንቀሳቀሰ። ሆኖም ግን፣ ፀረ-ኢትዮጵያዊነትና ፀረ-ተዋሕዶ ሃይማኖት ግንባር-ቀደም አራማጁ ወያኔ የቆመለትን ኢትዮጵያን የማፍረስና ተዋሕዶ ሃይማኖታችንን የማጥፋት ዓላማውን ለማሳካት ሲል የሰላሙን በር ለአንዴና ለመጨራሻ ጊዜ ዘጋው።
3. ወያኔ ፓትርያርክ ስለመሰየሙ፥
ሕጋዊው ፓትርያርክ በሕይወት እያሉ፤ ወያኔ በ21 ዓመታት ውስጥ ለሁለተኛ ጊዜ ሕገ-ቤተክርስቲያን ጥሶና ለሁለተኛ ጊዜም ከራሱ ጎሳ መዞ አውጥቶ አባ ማትያስን ፓትርያርክ አድርጎ ሾመ። የቀኖናውን መጣስ የተቀበሉት፤ የሰላሙንም ሂደት የረገጡት፤ የቤተክርስቲያን አንድነት ጥሪ ወደ ጎን ገሸሽ አድርገው የጣሉት አባ ማትያስ ማን ናቸው?
ሀ/ የኢትዮጵያዊ ዜግነታቸውን ክደው የሌላ ባዕድ ሀገር ዜግነት የተጎናፀፉ፤ ይኸም በተዋሕዶ ሃይማኖታችን አንጻር እንደ አንድ ታላቅ ሕጸጽ የሚታይ ነው።
ለ/ በደርግ ዘመነ መንግሥት ጊዜ በእየሩሳሌም የኢትዮጵያ ገዳማት ጳጳስ በነበሩበት ወቅት፤ ከኢትዮጵያ ኦርቶዶክስ ተዋሕዶ ቤተክርስቲያን በመገንጠል ቤተክርስቲያንን ከሁለት በመክፈላቸው፤ በወቅቱ የነበሩት 3ኛ ፓትርያርክ ብፁዕ ወቅዱስ አቡነ ተክለሃይማኖት ውግዝ ከመአርዮስ ብለው ጵጵስናቸውን ገፈዋቸዋል። በዚያን ወቅት፣ በስደት የኢትዮጵያ ኦርቶዶክስ ተዋሕዶ ቤተ ክርስቲያንን ክደው አፖስቶሊክ ቤተክርስቲያን (Apostolic Church) ያቋቋሙት አባ ጳውሎስ ቀደም ሲል በስውር የተደራጁበት የወያኔ ድርጅት ለሥልጣን ሲበቃ ፓትርያርክ አድርጎ ሾማቸው። አባ ገብረመድህንም ዘር ከልጓም ይስባል እንዲሉ በጎሳ ወንድማቸውን አባ ማትያስ ላይ የተጣለውን ውግዘት በመተላለፍ የኢትዮጵያ ኦርቶዶክስ ተዋሕዶ ቤተክርስቲያን የሊቃውንት ጉባዔ ሳያውቀው ሥልጣናቸውን መከታ በማድረግ በግለሰብ ደረጃ እንደ ችሮታ የጵጵስና ሥልጣናቸውን መልሰዋል። ይኸም ከፍተኛ የሆነ የሕገ-ቤተክርስቲያን ጥሰት ነው።
ፀረ-ኢትዮጵያዊና ፋሽስቱ ወያኔ ቡድንና ታሪካዊ ጠላቶቻችን በጣምራ በማበር በኢትዮጵያዊነት፣ በኦርቶዶክስ ተዋሕዶ ሃይማኖታችንና በሃይማኖታዊ ቅርሶቻችን ላይ ያወጁብንን መጠነ ሰፊ ጦርነት በሰፊው ከገመገምን በኋላና ከላይ የተጠቀሱትን እውን ታሪካዊ ክስተቶች በማገናዘብና በማጤን ፤ የሚከተለውን የአቋም መግለጫ አውጥተናል።
4. የአቋም መግለጫ፥
1ኛ/ ለ2ሺህ ዓመታት ቅዱሳንና ብፁዓን አባቶቻችን ካወረሱን ሕገ-ቤተክርስቲያን አኳያ፤ የኢትዮጵያ ኦርቶዶክስ ተዋሕዶ ቤተክርስቲያን ሕጋዊ ቅዱስ ሲኖዶስ በስደት የሚገኘውና በ4ኛው ፓትርያርክ በብፁዕ ወቅዱስ አቡነ መርቆሬዎስ ርዕሰ ሊቃነ ጳጳሳት ፓትርያርክ ዘኢትዮጵያ የሚመራው መሆኑንና በኢትዮጵያና ከኢትዮጵያ ውጭ በዓለም ላይ ለሚገኘው የኢትዮጵያ ኦርቶዶክስ ተዋሕዶ ቤተክርስቲያን ምዕመናን ቅዱስነታቸው አባት መሆናቸውን እናምናለን፣ እንገልጻለን።
2ኛ/ ሕገ-ቤተክርስቲያንን በመጣስ ወያኔ የሾማቸውን ፓትርያርክ ተብዬ አባ ማትያስን በሀገር ውስጥና በውጭ ሀገራት የሚገኙ የኢትዮጵያ ኦርቶዶክስ ተዋሕዶ ቤተ ክርስቲያን ምዕመናን አባትነታቸውን እንዳይቀበሉ በስደት የሚገኘው ሕጋዊው ቅዱስ ሲኖዶስ ባለፈው ጥር 2005 ዓ.ም. በሎስ አንጀለስ ከተማ፣ ካሊፎርኒያ፣ አሜሪካ ባካሄደው የቅዱስ ሲኖዶስ ምልዓተ ጉባዔ ላይ ያስተላለፈውን የውግዘት መግልጫ እንደግፋለን፣ እንቀበላለን። እውነተኛ የኢትዮጵያ ኦርቶዶክስ ተዋሕዶ ቤተክርስቲያን እምነት ተከታዮች የሆኑ ሁሉ ይህን ውሳኔ እንዲቀበሉ ጥሪ እናስተላልፋለን።
3ኛ/ በአሁኑ ጊዜ የተዋሕዶ ሃይማኖታችንና የቤተክርስቲያናችን ሕልውና በከፍተኛ አደጋ ላይ ይገኛል። ስለዚህ፣ ገለልተኛ ቤተክርስቲያን ነን የምትሉ ለተዋሕዶ ሃይማኖታችን ፅናት፤ ለቤተክርስቲያናችን አንድነትና ወያኔ የፈጠረብንን አደጋ ግንዛቤ ውስጥ በማስገባት እንዲሁም በ4ኛው ፓትርያርክ በብፁዕ ወቅዱስ አቡነ መርቆሬዎስ ላይ ወያኔ የፈጸምው ግፍና በደል በተለያዩ ማስረጃዎች የተረጋገጡ ስለሆኑ፤ 21 ዓመታት ከተጓዛችሁበት መንገድ ወጥታችሁ የብፁዕ ወቅዱስ አቡነ መርቆሬዎስ ርዕሰ ሊቃነ ጳጳሳት ፓትርያርክ ዘኢትዮጵያ አባትነት ተቀብላችሁ ቅዱስነታቸው የሚመሩት በስደት የሚገኘውን ሕጋዊው ቅዱስ ሲኖዶስ ተከታይ እንድትሆኑ ኢትዮጵያዊና ክርስቲያናዊ ጥሪያችንን እናቀርባለን። በጥብቅ ማሳሰብ የምንፈልገው ከሕገ-ቤተክርስቲያን አንጻር ገለልተኝነት የሚባል ነገር የለም። በእኛ እምነት 21 ዓምት ሥርዓተ-አልበኝነትን ያስፋፋው የገለልተኛ ቤተክርስቲያን በር ተዘግቷል።ምርጫው፥ ለተዋሕዶ ሃይማኖታችንና ለቤተክርስቲያናችን አንድነት ከቆመው በስደት ከሚገኘው ሕጋዊ ቅዱስ ሲኖዶስ ጋር ወይም ታሪክና ሕዝበ-ክርስቲያኑ ከሚፋረደው ወያኔ በአምሳሉ ከቀረጸው የአዲስ አበባው ሲኖዶስ ጋር መሆን ብቻ ነው።
4ኛ/ ፀረ-ኢትዮጵያዊና ፋሽስቱ ወያኔ 21 ዓመታት በተከታታይ በኢትዮጵያ ሕዝብ ጀርባ ላይ የሚፈጽመው ግፍና ሰቆቃ አልበቃው ብሎት፤ ኢትዮጵያዊ ዜግነታችንን (ተወላጅነታችንን) እና ከደማችን ውስጥ ያለውን ተዋሕዶ ሃይማኖታችንን ለመንጠቅ “ኢትዮጵያ ኦርቶዶክስ ተዋሕዶ ቤተክርስቲያን’’ የሚለውን ስም መጠቀም አትችሉም በማለት በውጭ ሀገራት ያቋቋምናቸውን አብያተ-ቤተክርስትያናት ከቻለ ለመንጠቅ ካልሆነ ለማፍረስ በሕገ-ወጡ ፓትርያርክ አባ ማትያስ አስተባባሪነት ክስ እንመሰርታለን በሚል የጀመረውን የማስፈራራት ዘመቻ በጥብቅ እናወግዛለን፤ በህብረት እንቋቋመዋለን።
5ኛ/ በውጭው ዓለም ያለውን ሕዝበ-ክርስቲያን ለማሰባሰብና ለማስተባበር እንዲያመች ይረዳ ዘንድ፤ በብፁዕ ወቅዱስ አቡነ መርቆሬዎስ ርዕሰ ሊቃነ ጳጳሳት ፓትርያርክ ዘኢትዮጵያ የሚመራው ቅዱስ ሲኖዶስ ጊዜና ቦታ መርጦ፤ ጳጳሳት፣ ካህናት፣ ዲያቆናት፣ መዘምራንና የምዕመናን ተወካዮችን ያካተተ ሁሉን-አቀፍ “ የተዋሕዶ አንድነት’’ መንፈሳዊ ጉባዔ እንዲጠራ እንጠይቃለን።
6ኛ/ በብፁዕ ወቅዱስ አቡነ መርቆሬዎስ ርዕሰ ሊቃነ ጳጳሳት ፓትርያርክ ዘኢትዮጵያ መሪነት፤ ብፁዓን አባቶችን፣ አበው ካህናትን፣ ወንድም ዲያቆናትን፣ መዘምራንን፣ የኢትዮጵያ ኦርቶዶክስ ተዋሕዶ ቤተክርስቲያን ምዕመናንና የኢትዮጵያ እስልምና ሃይማኖት ተከታዮችን ያቀፈ በዋሽንግተን ዲሲና በተለያዩ አህጉራት በሚገኙ ታላላቅ ከተማዎች በአንድ ቀን የሚካሄድ ዓለም-አቀፍ “ኢትዮጵያንና ሃይማኖቷን አድን’’ “ታላቅ ሰላማዊ ሰልፍ ቅዱስ ሲኖዶሱ አመች ቀንና ሰዓት መርጦ እንዲጠራ እንጠይቃለን።
ወስብሃት ለእግዚአብሔር።
ኃያሉ ፈጣሪ ኢትዮጵያንና ተዋሕዶ ሃይማኖታችንን ይታደግ!
ኢትዮጵያ ለዘላለም ትኑር!

! … በህወሓት መሪዎች ምርጫ የትግራይ ህዝብ ኣሳዘነ …!


! … በህወሓት መሪዎች ምርጫ የትግራይ ህዝብ ኣሳዘነ …!



ኣንድበቅድመ ጉባኤ ስብሰባቸው፣ ሁለቱም ቡድኖች ልዩነታቸውን ለማጥበብ ‘የመተካካት መርህ’ እንደሚተገብሩ ቃል ገብተው ነበር። ከሁለቱም ቡድኖች የተወሰኑ እንደሚቀነሱ (የቀሩ ደግሞ ስልጣን እንደ ሚከፋፈሉ) ስምምነት ነበር። ሸምጋዮቹ ኣዲሱ ለገሰ፣ ሃይለማርያም ደሳለኝና ቴድሮስ ኣድሓኖም (በረከት ስምዖንም እጅ ነበረው) የነ ኣባይ ወልዱ ኣደረጃጀት ስለተረዱ በነ ኣርከበ ቡድን ጫና ፈጥረዋል።
የሸምጋዮቹ ኣቋም ‘ህወሓት መከፋፈል የለበትም፤ ህወሓት ከተዳከመ ኢህኣዴግ ኣቅሙ ይዳከማል፣ ስለዚ compromise ማድረግ ኣለባቹ’ የሚል ነበር። ግዝያዊ ሽምግልናው ሰራና ወደ ጉባኤ ተገባ።
ሁለት
የነ ኣባይ ወልዱ ቡድን ራሱ የመለመላቸው ጉባኤተኞች (በራስ ኣለመተማመን ይመስላል) በስብሰባው 1ለ5 ኣደረጃጀት (የድርጅት ስራ) ተግባራዊ በማድረግ እነሆ የነ ኣርከበ ቡድን መምታት ችለዋል። ዕቅዱ የነ ኣርከበ ቡድን ሙሉ በሙሉ ከስራ ኣስፈፃሚነት ማስወገድ ነበር።
በጉባኤው ‘የመለስ ታሪክና ራእይ’ የኣንድ ቀን ሙሉ ኣጀንዳ ነበር። ‘የመለስ ራእይ’ ተብለው የሚነገሩ ፖሊሲና ስትራተጂዎች በቡድኖቹ ልዩነት ፈጥረው ሲያከራክሩ ውለዋል። ኣንዱ ቡድን ‘የመለስ ራእይ ሳይከለስ ሳይበረዝ መተግበር ኣለበት’ ሲል (እነ ኣባይና ኣዜብ) ሌላኛው ደግሞ ‘መለስ የራሱ ሚና ተጫውተዋል፣ ሁሉም የህወሓት ታሪክ ለመለስ መስጠት ግን የሰማእታት ሚና ማራከስ ይሆንብናል’ ተብሏል (የነ ኣርከበ ቡድን)።
ኣርከበ ‘መለስን ኣታካብዱት የራሳችሁን ታሪክ ስሩ’ (ቃል በቃል ኣይደለም) የሚል ሓሳብ ሲያንፀባርቅ፣ ስዩም መስፍን ደግሞ ‘መለስ ጥሩ ነገር ሰርተዋል ግን በዲፕሎማሲ እሱ የሰራውን ካለ ‘እስቲ የሰራቸውን ነገሮች ዘርዝሩልኝ’ ዓይነት ኣንድምታ ያለው ሓሳብ ሲሰጥ የመለስን ሚና ኣታጋንኑት ለማለት ነበር። ነገር ግን የስዩምን ሓሳብ በኢቲቪና ሬድዮ ፋና ሲቀርብ መለስን ያሞካሸበት ሓሳብ ኣስመስለው እንዳቀረቡት ስምቻለሁ።
ባጠቃላይ ልዩነታቸው ግልፅ ነበር። የነ ኣርከበ ቡድን በነ ኣባይ ወልዱ የተደራጀ 1ለ5 ታክቲክ ተረድተውታል። እንደሚሸነፉ ገብቷቸዋል። ተመካከሩ። በምርጫ ተሸንፈዋል ከሚባሉ ራሳቸው እንድያገሉ (እንዲቀነሱ) ተገደዱ። ጥሩ ማምለጫ ኣገኙ፤ ‘ተገንጥለው ወጡ’ ወይ ምርጫ ተሸነፉ ከሚባሉ ‘በፍቃደኝነት ተሰናበቱ’ ቢባሉ ይሻላል።
ከተቀነሱ ዘጠኝ ሰዎች ሰባቱ የነ ኣርከበ ናቸው። ኣንዱ የነ ኣባይ ወልዱ ሲሆን ኣንድ ደግሞ ከመሃል ሰፋሪዎች ነው። ጸጋይ በርሀ እንዲቀነስ ታስቦ የነበረ ቢሆንም ባልታወቀ ምክንያት ንጉሰ ገበረ ተቀነሰ። ከተመረጡት 45 የህወሓት ማእከላዊ ኮሚቴ ኣባላት ዘጠኙ ሲቪል እንደሆኑ ከመንግስት ሚድያ ሰምተናል። ዘጠኝ ከኣርባ ኣምስት ትንሽ ነው። ይባስ ብሎ ደግሞ እነዚህ ሲቪሎች የኣለቆቻቸው ታማኝ ኣገልጋዮች የነበሩ ናቸው። በራሳቸው መቆም የሚችሉ ኣይደልም።
በስራ ኣስፈፃሚ ኮሚቴ ኣባልነት ሙሉ በሙሉ በሚባል ሁኔታ እነ ኣባይ ወልዱ ኣሸናፊ ናቸው። ስምንት ለ ኣንድ (ቴድሮስ መሃል ሰፋሪ ቢሆንም) በሆነ ውጤት ኣሸንፈዋል። የነ ኣርከበ ቡድን ኣንድ ነጥብ (ዶ/ር ደብረፅዮን ብቻ) ኣለው። የነ ኣባይ ቡድን ኣባዲ ዘሞና ፀጋይ በርሀ (ሁለቱም የነ ኣርከበ ቡድን ነበሩ) ከስራ ኣስፈፃሚነት በማባረር ኣለም ገብረዋህድ (የኣባይ ወልዱ የቅርብ ወዳጅ)ና ገብረመስቀል ታረቀ ኣስገብተዋል። መለስ ዜናዊ ደግሞ በትርፉ ኪዳነማርያም (የኣባይ ወልዱ ሚስት የነበረች ወይ የሆነች) ተይዘዋል።
የትርፉ ኪዳነማርያም ፖሊትብሮ ኣባል መሆን የነ ኣባይ ወልዱ ቡድን ማሸነፉ ማረጋገጫ ነው የሚሉ ኣስተያየት ሰጪዎች ኣሉ። ‘ትርፉ የፖሊት ቢሮ ኣባል ሆነች’ ሲባል ማን ትዝ እንዳለኝ ታውቃላቹ??? ተወልደ ወልደማርያም። ይህንን ሲሰማ ብፃይ ተወልደ ምን ብሎ ይሆን (ኣጠገቡ በነበርኩ!)?
ሦስት
ባሰባሰብኩት የህዝብ ኣስተያየት መሰረት በህወሓት ጉባኤና ወጤቱ የትግራይ ህዝብ (ኣብዛኛው የፓርቲው ኣባል ጨምሮ) በጣም ኣዝነዋል። በተመረጡ ሰዎች ተስፋ የለውም። ህዝቡ ኣዳዲስ የህወሓት ኣመራሮች በመጠባበቅ ላይ ነበር። የፓርቲው ሊቀመንበርነቱን ይዞ የቀጠለው ኣባይ ወልዱና ምክትሉ እንደሆነ የሚቆየው ደብረፅዮን ገብረሚካኤል ይቀየራሉ (በሌሎች ወጣት ሙሁራን ይተካሉ ብሎ) ሲጠባበቅ ነበር።
የትርፉ ኪዳነማርያም ፖሊት ቢሮ ኣባል መሆን ብዙ ሰው ኣስገርሟል። ኣባይ ወልዱና ኣዜብ መስፍንም ኣልተጠበቁም። ቴድሮስ ሓጎስ ስልጣኑ ይለቃል የሚል ግምት ነበር። ኣባይ ፀሃየና ኣርከበ ዕቁባይ ለፓርቲው ሊቀመንበርነት ታስበው ነበር (በህዝቡ)። ባጠቃላይ የፖሊት ቢሮ ኣባላት ማንነት ኣስጨናቂ ሁነዋል። ‘እነዚህ ሰዎች መርተው የት ያደርሱናል?’ በሚል የፓርቲው ኣባላት ግራ ተጋብተዋል። በጉባኤው የተሳተፉ ኣባላት ጭምር በድራማው ተገርመዋል።
ህዝቡን በጣም ተስፋ ያስቆረጠው ጉዳይ ‘መተካካት’ ነው። ‘የመተካካት ዕቅድ’ በህወሓቶች ከሽፈዋል ማለት ይቻላል። የመተካካት መንፈስ ፈፅሞ ኣልታየም። ከጉባኤው በፊት በነበረ የማእከላዊ ኮሚቴ ኣባላት ስብሰባ የተስማሙበት ነጥብ ዋነኛው ‘መተካካት’ እንደሚኖር ነበር። ኣሁን የታየው ግን ‘መተካካት’ ሳይሆን የተወሰኑ ሰዎች የመቀያየር ሁኔታ ብቻ ነው።
እነዚህ የተቀያየሩ ሰዎች በምን መስፈርት ነው? በዕድሜ? በስልጣን ሰኔሪቲ? በብቃት? NO. በሁሉም ኣይደለም። በፖለቲካ ልዩነትና በዝምድና ነው። ይሄን የሚያሳየን ህወሓት ተተኪ ወጣቶች ማበራታታት ኣይፈልግም። የመሪዎቻችን ዓላማ በስልጣን መቆየት መሆኑ ግልፅ ሁነዋል። በህወሓት ውስጥ ጥሩ ሓሳብ የያዘ ወጣት ተቀባይነት ኣይኖረውም። በህወሓት ውስጥ ሁነው ለለውጥ መታገል ውጤት ሊያመጣ ኣይችልም።
ደግሞ የትእምት ሃብት ለማን ትተው ስልጣን ሊለቁ??? መተካካት፣ ስልጣን መልቀቅ ኣይታሰብም። በፓርቲው ኣባላት ጥያቄ (በጉባኤ) ቀርቶ በህዝብ ጥያቄም (በምርጫ) ከስልጣን ለመውረድ ፍቃደኞች ኣይሆኑም። የሚያስገደድ ሁኔታ ካላጋጠማቸው በቀር። ዋናው መፍትሔ የሚሆነው የህዝቡ የፖለቲካ ንቃተ-ህልና ከፍ እንዲል ማድረግ ነው።
It is so!!!

ከጠቅላይ ፍ/ቤት እስከ ሚንስትሮች ም/ቤት


ከጠቅላይ ፍ/ቤት እስከ ሚንስትሮች ም/ቤት

ተመስገን ደሳለኝ
መጋቢት 18/2005 ዓ.ም የእነ እስክንድር ነጋ ይግባኝ ለመጨረሻ ጊዜ ተብሎ ተቀጥሯል፡፡ በዚህ መዝገብ የተከሰሱት የህሊና እስረኞች ይግባኝ ከጠየቁ አምስት ወር አልፏቸዋል፡፡
ለምን? …በአዲስ መስመር እንነጋገርበት፡፡
የይግባኙን ውሳኔ ያዘገየው የፖለቲካ ተንታኝ እና ጋዜጠኛ እስክንድር ነጋ ጉዳይ ነው፡፡ ምክንያቱ ደግሞ የተከሰሰው በሀሰት ስለሆነ ነው፡፡ በእርግጥ ይህንን ያልኩት እኔ አይደለሁም፤ የጠቅላይ ፍርድ ቤት የመሀል ዳኛ የሆነው አቶ አማረ አሞኘ ነው፡፡ ባለፈው ወር ዳኛው አቃቢ ህጎቹን ሰበሰበና እንዲህ አላቸውከጠቅላይ ፍ/ቤት እስከ ሚንስትሮች ም/ቤት
፡-‹‹ይህን ሰው አሻባሪ ነው ብላችሁ ስትከሱት ያቀረባችሁት ማሰረጃ በተለያየ ጊዜ የፃፈውን ፅሆፎች፣ ቃለ-መጠይቆች እና በአንድ የፖለቲካ ፓርቲ መድርክ ላይ ተናገረው ያላችሁትን ብቻ ነው፡፡ ሌላው ቀርቶ ፅሁፉና ንግግሩ ያስከተለው አደጋ አልተገለፀም፤ ወይም ምንም አይነት አደጋ አላስከተለም ማለት ነው፡፡ ይህ ደግሞ ተከሳሹ ላይ ቅጣት ለመጣል አያስችልም፡፡ ስለዚህም ሌላ ጥፋተኝነቱን የሚያረጋግጥ ማሰራጃ ካላችሁ አቅርቡ? አሊያም በሚቀጥለው ቀጠሮ ሲቀርብ በነፃ እለቀዋለሁ፡፡›
.አቃቢ ህጎቹ ምንም ማስረጃ አልነበራቸውምና በደፈናው ‹‹ሰውየው አሸባሪ ስለሆነ ዝም ብለህ፤ ይግባኙን ውድቅ አድርግና የከፍተኛው ፍርድ ቤቱን ውሳኔ አፅናበት›› የሚል ይዘት ያለው ተመሳሳይ አቋም አንፀባረቁ፡፡ ዳኛው ምን አይነት መንፈሳዊ ኃይል ተጭኖበት እንደ ሆነ እንጃ! ‹‹በፍፁም ከህግ ውጪ አልሰራም፤ ህሊና አለኝ›› ብሎ ፍንክች ያባ ቢለዋ ልጅ ይላል፡፡
ይህን ጊዜም ነገሩ ቦግ ያደረገው አንድ አቃቢ ህግ
‹‹አንተ እስክንድርን እለቃለሁ የምትለው ያገርህ ልጅ ጎንደሬ ስለሆነ ነው!››
ይለዋል ቁጣ በተቀላቀለበት ድምፅ፡፡ ዳኛ አማረም ይበልጥ ተናዶ
‹‹እኔ እሰከ ዛሬ ድረስ ያገለገልኩት ሀገሬን ኢትዮጵያ እንጂ የትውልድ መንደሬን አይደለለም፡፡ ደግሞም ዘረኝነት የለብኝም›› ሲል መለሰለት፡፡
በእንዲህ አይነት ሁኔቴ መዋዘገቡ በመካረሩ መግባባት አልቻሉምና ጉዳዩ ሚንስትሮች ምክር ቤት ደረሰ፡፡ በሚንስትሮች ም/ቤትም ስብሰባውን የመራው ምክትል ጠቅላይ ሚንስትሩ ደመቀ መኮንን ሲሆን፣ ዳኛውም አብሮ ቀርቧል፡፡ አቶ ደመቀ መጀመሪያ ዳኛው ስለጉዳዩ ማብራሪያ እንዲሰጥ ጠየቀ፡፡ ዳኛውም ስለክሱ አጠር አድርጎ ካብራራ በኋላ እንዲህ ሲል ደመደመ፡-
‹‹እስክንድር ነጋን ‹አሸባሪ› ብሎ ለመፍረድ የሚያስችል በቂ ማስረጃ ስላልቀረበ በሚቀጥለው ቀጠሮ በነፃ አሰናብተዋለሁ፤ እንዲህ ማድረግ አትችልም የምትሉኝ ከሆነ ግን ክቡራን ሚንስትሮች በዕለቱ በችሎት ለመሰየም ፍቃደኛ አለመሆኔን በትህትና ትረዱኛላችሁ ብዬ አስባለሁ!››
ከዚህ በኋላ ሚኒስትሮቹ መወያየት ጀመሩ፡፡ ተከራከሩ፤ በመጨረሻም አቶ ደመቀ እንዲህ አለ፡-
‹‹እኔም ከአቶ አማረ ጋር እስማማለሁ፡፡ ምክንያቱም በዚህ ሰውዬ /እስክንድር/ የተነሳ ከፍተኛ አለም አቀፍ ጫና እየደረሰብን ነው፡፡ ስለዚህም ብንፈታው ተጠቃሚዎቹ እኛው ነን ብዬ አስባለሁ፡፡››
አንድ ሚኒስትር ቀጠለ፡-
‹‹በመሰረተ ሃሳቡ ላይ እስማማለሁ፡፡ ነገር ግን እስከዛሬ አስረነው ‹ነፃ ነህ› ብለን ብንለቀው የፖለቲካ ኪሳራ ስልሚያስከትልብን፣ ከፍርዱ ላይ ቅንስናሽ አድርገን ይቅርታ ጠይቆ እንዲወጣ ብናደርግ የተሻለ ነው፡፡››
ሌላ ሚኒስትር ቀጠለ፡-
‹‹እስክንድርን እኔ አውቀዋለሁ፤ የአሜሪካን ሀገር መኖሪያ ፍቃድ እና ብዙ ሀብት እያለው እዚህ ነገር ውስጥ የገባ ሰው ነው፡፡ እናም በፍፁም ይቅርታ ለመጠየቅ ፍቃደኛ አይሆንም››
ሌላኛው ሚንስትር ቀጠለ፡-
‹‹ኧረ ለመሆኑ መለስ አለም አቀፍ ጫና እንደሚያስከትል እያወቀ ለፓርቲያችን ጥቅም ብሎ የገባበትን ጉዳይ፣ ዛሬ እርሱ አልፏል ብለን ጫና ይምንፈራበት ምክንያት ከየት የመጣ ነው? በቃ! መለስ አደገኛ ሰው ነው ብሎ አስሮቷል፡፡ አለቃ! እዛው ይበስብስ!››
የሚንስትሮች ምክር ቤትም ቢዚህ ጉዳይ ላይ መስማማት ሳይችል በመቅረቱ የጠቅላይ ፍርድ ቤቱ ፕሬዘዳንት አቶ ተገኔ ቀርቦ በጉዳዩ ላይ ማብራሪያ እንዲሰጥ ቀጠሮ ይዘው ተለያዩ፡፡
…በእርግጥ ከአቶ ተገኔ ማብራሪያ በኋላ የሚኒስትሮች ም/ቤት ምን አይነት አቋም ላይ እንደደረሰ ለማወቅ ያደረኩት ጥረት ሊሳካ አልቻለም፡፡ መረጃውንም እስከ ዛሬ ያቆየሁት ለዚህ ነበር፡፡ አሁን ግን የቀጠሮ ቀን ሰለደረሰ ልነግራችሁ ተገደድኩ፡፡
እናም የፊታችን ረዕቡ ከጠቅላይ ፍርድ ቤት ከሚከተሉት አራት ነገሮች አንዱን እናያለን ብዬ አስባለሁ፡፡
1. የሚንስትሮች ም/ቤት ጫናው ስለከበደው በነፃ ይለቀዋል፣
2. መለስ እያወቀ የገባበትን ጫና አንፈራም! (ራዕዩ እናስቀጥላለን እንደማለት ነው) በማለት የከፍተኛውን ፍርድ ቤት ውሳኔ ያፀናሉ፣
3. ከተፈረደበት 18 ዓመት ላይ ቅንስናሽ አድርገው፣ ይቅርታ እንዲጠይቅ ወደ ማግባባቱ ይሄዳሉ፣
4. ዳኛው አሞኘ እንደፎከረው ከችሎቱ ይቀርና አሁንም
‹‹የመጨረሻ›› ቀጠሮ ይሰጣል፡፡
የሆነ ሆኖ እንዲህ የሚል አንድ እውነት ‹‹በመሪዎቻችን›› ግንባር ላይ ተቸክችኳል፡፡ ‹‹ሲቪሉ ጀግና እስክንድር ነጋ እያርበደበደው ነው!››
አዎ! እኔም እላለሁ፣ የእስክንድር እና መሰሎቹ የግፍ እስር አርብድብዶ ብቻ አይተዋችሁም!!
ድል ለኢትዮጵያ ህዝብ! ውድቀት ለአምባገነኖች!!
www.ecadforum.com/Amharic/archives/6658

“የህዳሴው ግድብ” ከግማሽ በላይ የኢትዮጵያ አይደለም


“የህዳሴው ግድብ” ከግማሽ በላይ የኢትዮጵያ አይደለም

ትልቁን ድርሻ ኤፈርት ይዟል
hidassie dam


“በራሳችን መሐንዲስ፣ በራሳችን ገንዘብ፣ በራሳችን የተባበረ ክንድ እንገነባዋለን” በማለት ሟቹ ጠቅላይ ሚኒስትር መለስ ዜናዊ በመስቀል አደባባይ ታላቅ ህዝባዊ ድጋፍና “መዓበላዊ መነቃቃት” ፈጠሩበት የተባለለት የ”ህዳሴው” ግድብ 51 በመቶ ድርሻ የኢትዮጵያ እንዳልሆነ ነዋሪነታቸው በአውሮፓ የሆነ ዲፕሎማት በተለይ ለጎልጉል ገለጹ።
ስማቸው ምስጢር እንዲሆን የጠየቁት ዲፕሎማት እንዳሉት 51 በመቶ ባለድርሻ የሆነችው አገር አውሮፓ የምትገኝ የኢትዮጵያ አጋር አገር ናት። ለጊዜው የባለድርሻዋን አገር ስም መግለጽና የውሉን ዝርዝር ይፋ ማድረግ ያልፈለጉት ዲፕሎማት ኢትዮጵያ በግድቡ ላይ የፈለገችውን ውሳኔ በራስዋ ለማስተላለፍ እንደማትችል፤ ያላት ድርሻ 49 በመቶ ብቻ በመሆኑ ድምጽን በድምጽ በሚሽረው በአብላጫ ድምጽ ህግ መሰረት በግድቡ ላይ የሚወሰነው ውሳኔ 51 በመቶ ባለድርሻ በሆነችው አውሮፓዊቷ አገር መሆኑን አብራርተዋል።
49 በመቶ ተብሎ የተገለጸው የድርሻ መጠን ጅቡቲን ጨምሮ የተለያዩ አገሮች የተቀራመቱት መሆኑን ያመለከቱት የመረጃው ባለቤት፣ አገር ውስጥ ካሉት የንግድ ተቋማት መካከል ኤፈርት ትልቁን ድርሻ መውሰዱን እንደሚያውቁ ተናግረዋል።
የመንግስት መስሪያ ቤቶች፣ የግል ባለሃብቶች፣ ማህበራት፣ ባንኮችና የተለያዩ ግለሰቦች በትዕዛዝ አክሲዮን መግዛታቸውን ያስታወሱት እኚሁ ዲፕሎማት “በግድቡ ዙሪያ ከሚፈራው የጸጥታ ችግር በላይ አስጊው ጉዳይ የባለድርሻዎች ምስጢር መሆን ነው” ሲሉ ስጋታቸውን ገልጸዋል።
መንግስት ለግንባታው የሚሆን ከፍተኛ ገንዘብ ከአውሮፓዊቷ አገር ማግኘቱን ያመለከቱት የጎልጉል ምንጭ፣ “ከአገር ውስጥ በአክሲዮን ስም የሚሰበሰበው ገንዘብ ለአገር ውስጥ በጀት ማሟያና ለመንግስት የስራ ማከናወኛ የሚውል ነው” ብለዋል።
መንግስት በተለያየ መድረክ በተደጋጋሚ ፕሮጀክቱ “በአገር ውስጥ ባለሙያ፣ በአገር ውስጥ ሃብት፣ የሚከናወን የህዳሴ መገለጫ ነው” በሚል ብሄራዊ መነቃቃት የተፈጠረበት የአቶ መለስ ማስታወሻ እንደሆነ ከመግለጽ ውጪ ስለ አክሲዮን ድርሻና አክሲዮን ስለገዙ አገራት እስካሁን የተናገረው የለም።
ግድቡ በመጀመሪያው ምዕራፍ ሲጠናቀቅ 5 ቢሊዮን ዶላር እንደሚፈጅ መገለጹ ይታወሳል። የአባይ ግድብ ከሱዳን ድንበር 10 ኪሎ ሜትር ርቀት ላይ ቤኒሻንጉል ክልል እንደሚገኝ መንግስት የግድቡን ሥራ ይፋ ሲያደርግ ማስታወቁ አይዘነጋም።
ይህ በእንዲህ እያለ ፋና በዛሬው እለት ባሰራጨው ዜና “የወንዙን ተፈጥሯዊ የፍሰት አቅጣጫ የማስቀየሩ ስራ እየተሰራ” መሆኑን የገለጸ ሲሆን፥ “ወንዙ ይሄድበት የነበረውን ቦታ 1780 ሜትር ከፍታ ያለው ግድብ የመካከለኛው ክፍል የሚያርፍበት እንደሚሆንም” የፕሮጀክቱ ሥራአስኪያጅ  ኢንጅነር ስመኘው መናገራቸውን ጠቅሷል። “አቅጣጫውን የማስቀየሩ ስራ ከመጭው ክረምት በፊት” ለማጠናቀቅ ርብርብ እየተደረገ መሆኑን መሃንዲሱ ጠቅሰው፥ በቅርቡም ዕውን ይሆናል ብለዋል። ግድቡ ግንባታው የተጀመረበት 1ኛ ዓመት በዓልም ከመጪው ረቡዕ ጀምሮ በአዲስ አበባ፥ እንዲሁም መጋቢት 24 ፕሮጀክቱ በሚገኝበት ስፍራ በተለያዩ ስነ ጥበባዊ ዝግጅቶችና  ‘መለስ ቃልህ ይከበራል፤ ታላቁ የህዳሴ ግድብም በህዝባችን ተሳትፎ እውን ይሆናል’ በሚል መሪ ቃል ይከበራል” በማለት የዜናው ዘገባ ገልጾዋል።
http://www.goolgule.com/abay-dam-not-ethiopias/

የኢህአዴግ አባል ድርጅቶች በአብዛኛው ነባር አመራሮቻቸው በስራ አስፈጻሚነት ቀጠሉ


የኢህአዴግ አባል ድርጅቶች በአብዛኛው ነባር አመራሮቻቸው በስራ አስፈጻሚነት ቀጠሉ

መጋቢት ፲፪ (አስራ ሁለት) ቀን ፳፻፭ ዓ/ም
ኢሳት ዜና:-የኢህአዴግ አባል ድርጅቶች ሰሞኑን በተከታታይ ባካሄዱዋቸውና በመተካካት ረገድ እምብዛም ለውጥ ያልታየባቸው
ጉባዔዎች በአብዛኛው ነባር አመራሩን ይዘው ሲያስቀጥሉ መጠነኛ የሆነ እርምጃም ወስደዋል፡፡
በዚሁ መሰረት ኦህዴድ አቶ አባዱላ ገመዳን፣ ግርማ ብሩን እና ኩማ ደመቅሳን ከስራ አስፈጻሚ ኮሚቴ አባልነት ሲያሰናብት፤ ብአዴን በበኩሉ የፍትህ ሚኒስትር የሆኑትን አቶ ብርሃን ኃይሉን፣ደኢህዴን ደግሞ አቶ ተሾመ ቶጋን አሰናብቷል፡፡
ብአዴን በጤና ችግር መደበኛ ስራቸውን ማከናወን የተሳናቸውና ነባር ታጋይ የሆኑትን አቶ ህላዊ
ዮሴፍን፣ኦህዴድ ወ/ሮ አስቴር ማሞን በኢህአዴግ ስራ አስፈጻሚነት እንዲመረጡ አድርጓል፡፡በተጨማሪም ኦህዴድ
የፌዴራል ፖሊስ ኮምሽነሩን አቶ ወርቅነህ ገበየሁን የኢህአዴግ ስራ አስፈጻሚ አባል እንዲሆኑ መርጧቸዋል፡፡
በሟቹ ጠ/ሚኒስትር አቶ መለስ ዕቅድ መሰረት በመተካካት ሒደቱ እስከ 2007 ዓ.ም ሙሉ በሙሉ ቦታ ይለቃሉ
ተብለው ይገመቱ የነበሩት ነባር ታጋዮች ለቀጣይ ሁለት ዓመት ተኩል ጊዜያት እንዲቀጥሉ መደረጉ በተለይ ከፍተኛ
አመራሩ የመለስን ራዕይ ለማሳካት በተደጋጋሚ የገባውን ቃል ማጠፉን ለጉዳዩ ቅርበት ያላቸው ወገኖች ተናግረዋል፡፡
በ2003 ዓ.ም በመተካካት ስም የመንግስት ከፍተኛ ኃላፊነታቸው የለቀቁት አቶ አዲሱ ለገሰን ጨምሮ አቶ በረከት
ስምኦን፣አቶ ህላዊ ዮሴፍ፣አቶ አባይ ወልዱ እና የመሳሰሉት ስልጣናቸውን ወደማጠናከር ፊታቸውን
ማዞራቸው የመተካካት ዕቅዱ ውሃ እንደበላው ማሳያ ሆኗል፡፡ አቶ አዲሱ ከድርጅቱ በአቶ መለስ አማካኝነት ከተሰናበቱ በሁዋላ ተመልሰው መምጣታቸው አስገራሚ ሆኗል። አቶ አዲሱ ከስልጣን እንዲነሱ የተደረገው እርሳቸው ባልጠበቁበት መንገድ እንደነበር መግለጻቸው ይታወሳል።
በመተካካት ስም በ2003 የመንግስት እና ከፓርቲ ኃላፊነታቸው የለቀቁትን እነ አቶ ስዩም መስፍን ጨምሮ ሌሎች 9
የህወሃት አባላት በራሳቸው ፈቃድ በአብዛኛው ከጤና ጋር በተያያዘ ድርጅቱን ለመልቀቅ ባቀረቡት ጥያቄ መሰረት የተሰናበቱ ሲሆን የእነዚህ ሰዎች መልቀቅ እንደመተካካት ለማየት እየተደረገ ያለው የማደናገሪያ ፕሮፖጋንዳ አሳዛኝ መሆኑን ምንጮቻችን ተናግረዋል፡፡በራሳቸው ፈቃድ ከለቀቁት መካከል አቶ ስዩም መስፍን ፣ አቶ ብርሃነ ገብረክርስቶስ ፣ አቶ አርከበ
ዕቁባይና አቶ ዘርዓይ አስገዶም ይገኙበታል፡፡
የዘጠኝ የህወሃት ማዕከላዊ ኮሚቴ አባላት በአንድ ጊዜ መልቀቂያ ማቅረባቸው አጋጣሚ ሳይሆን ከአቶ መለስ ህልፈት
በሓላ በህወሃት ውስጥ ከተፈጠረው ልዩነት ጋር በተያያዘ ሳይሆን እንደማይቀር ምንጫችን ቢጠቅስም ይህን በተመለከተ
ለማረጋገጥ ያደረግነው ሙከራ ለጊዜው አልተሳካም፡፡ ብዙዎች እንደሚገምቱት ከአቶ አርከበ እቁባይ ጋር ጤነኛ ግንኙነት ያልነበራቸው ወ/ሮ አዜብ መስፍን በዚህ ጉባኤ በድል አድራጊነት ወጥተዋል። ህወሀት የአቶ አባይ ወልዱን  ባለቤት ወ/ሮ  ትረፉ ኪዳነማርያምንም በስራ አስፈጻሚነት መርጧቸዋል።
ድርጅቶቹ ባካሄዱት ምርጫ መሰረት ከህወሃት፡- አቶ አባይ ወልዱ፣ዶ/ር ደብረጽዮን ገ/ሚካኤል፣ወ/ሮ አዜብ
መስፍን፣አቶ አባይ ጸሐዬ፣ዶ/ር ቴዎድሮስ አድሃኖም፣ወ/ሮ ፈትለወርቅ ገ/እግዚአብሔር፣አቶ በየነ ምክሩ፣አቶ ኪሮስ
ቢተው፣አቶ አስመላሽ ወ/ስላሴ፤ከብአዴን፡-አቶ አዲሱ ለገሰ፣አቶ በረከት ስምኦን፣አቶ አያሌው ጎበዜ፣አቶ ገዱ
አንዳርጋቸው፣አቶ ደመቀ መኮንን፣አቶ አለምነው መኮንን፣አቶ ካሳ ተ/ብርሃን፣አቶ ህላዊ ዮሴፍ፣አቶ ተፈራ
ደርበው፤ከኦህዴድ፡-አቶ አለማየሁ አቶምሳ፣አቶ ሙክታር ከድር፣ወ/ሮ አስቴር ማሞ፣አቶ ወርቅነህ ገበየሁ፣አቶ
ሶፊያን አህመድ፣አቶ ድሪባ ኩማ፣አቶ አድልቃድር ሁሴን፣አቶ ኡመር ሁሴን፣አቶ አበራ ኃይሉ፤ ከደኢህዴን፡-አቶ
ኃይለማርያም ደሳለኝ፣አቶ ሽፈራው ሽጉጤ፣አቶ ሬድዋን ሁሴን፣አቶ መኩሪያ ኃይሌ፣አቶ ሲራጅ ፈጌሳ፣ዶ/ር ሽፈራው
ተ/ማርያም፣አቶ አለማየሁ አሰፋ አቶ ደሴ ዳልቼ፣አቶ ተስፋዬ ቢነግዴ የኢህአዴግ ስራ አስፈጻሚ ሆነው እንዲሰሩ
በየድርጅቶቻቸው ተመርጠዋል፡፡
ከፊታችን ቅዳሜ መጋቢት 14 ቀን እስከ 17 ቀን 2005 ዓ.ም በባህርዳር ከተማ የሚካሄደው የኢህአዴግ ጉባዔ
አቶ ኃይለማርያም ደሳለኝን በሊቀመንበርነት፣አቶ ደመቀ መኮንን በምክትል ሊቀመንበርነት በድጋሚ ይመርጣል ተብሎ
እንደሚጠበቅ ምንጮቻን ጠቁመዋል፡፡
የኢህአዴግ ድርጅቶች ያደረጉትን ሹም ሽር በተመለከተ ጥያቄ ያቀረብንላቸው አንድ የቀድሞ የሀወሀት ነባር ታጋይ ፡ ምርጫውን “ውሀ ቢወቅጡት ነው” ብለውታል። “ከእነዚህ ሰዎች ምንም የሚጠበቅ ነገር የለም፣ ምን አዲስ ነገር እንደማይፈጥሩም ይታወቃል። የአፈና ስርአቱ እንደሚቀጥል ጥሩ ማሳያ ነው” ብለዋል ታጋዩ።

በአፋር ህጻነት በርሀብ እየረገፉ ነው


በአፋር ህጻነት በርሀብ እየረገፉ ነው

መጋቢት ፲፪ (አስራ ሁለት) ቀን ፳፻፭ ዓ/ም
ኢሳት ዜና:-በክልሉ ካለፉት አራት ወራት ጀምሮ የተከሰተው ከፍተኛ ረሀብና የውሀ እጥረት የበርካታ ህጻናትን ህይወት መቅጠፉን ነዋሪዎች ለኢሳት ገልጸዋል።
ምንም እንኳ 60 በመቶ በሚሆነው የአፋር አካባቢ ከፍተኛ የሆነ የምግብና የውሀ እጥረት ቢከሰተም ፣ ችግሩ ከሁሉም ወረዳዎች አስከፊ ሆኖ በቀጠለበት የእዳ ወረዳ 6 ህጻናት በአንድ ወር ውስጥ ሞተዋል። ይህ አሀዝ በአንድ ሰፈር ብቻ የተጠናከረ እንጅ በአጠቃላይ በወረዳው በተከሰተው ረሀብና የውሀ እጥረት የሟቾች ቁጥር በብዙ መቶዎች ሊደርስ እንደሚችል የአካባቢው ተወላጆች ገልጸዋል።
አንድ ጀሪካን ውሀ በ60 ብር ለመግዛት መገደዳቸውን የገለጹት አንድ ስማቸው እንዳይጠቀስ የፈለጉ የእዳ   ወረዳ ነዋሪ፣ የአካባቢው ነዋሪ ፍየሎቹና ግመሎቹ አልቀውበት ወደ አሳይታ ስደት መጀመራቸውን ገልጸዋል፡፡ አሳይታ በሰላም የደረሱት በህይወት ሲትረፉ ሌሎች ደግሞ በመንገድ ላይ አልቀዋል ።
የመንግስት እርዳታ እንዳልመጣላቸው የተነጋሩት ነዋሪዎቹ ፣ አስቸኳይ እርዳታ ካልደረሰ አስከፊ እልቂት ይፈጠራል ብለዋል።
በአካባቢው የትጥቅ ትግል በማድረግ ላይ የሚገኘው የአፋር ጋድሌ ሊ/መንበር ኮሎኔል ሙሀመድ አህመድ ለኢሳት እንደገለጡት ከፍተኛ ረሀብ በአካባቢው መግባቱን ድርጅታቸው እንደሚያውቅ ገልጸዋል።
በዚህ አመት ከአፋር ሌላ በሶማሊና በተለያዩ የአማራ፣ የደቡብና ኦሮሚያ ክልሎች ድርቅ መግባቱን መረጃዎች ያመለክታሉ።
በአዲስ አበባ ህጻናት በምግብ እጦት ትምህርታቸውን መከታተል እንዳልቻሉ ሸገር ኤፍ ኤምን በመጥቀስ ኢሳት ትናንት መዘገቡ ይታወሳል።
በግብርናው መስክ ከፍተኛ እመርታ እንዳገኘ ከመናገር ተቆጠቦ የማያውቀው የኢህአዴግ አገዛዝ ፣ ላለፉት 21 አመታት ኢትዮጵያን በምግብ ራሱዋን እንደሚያስችል ቢናገርም እስካሁን ድረስ የታየ ለውጥ የለም። በቅርቡ ይፋ ሆነ አንድ ጥናት እንዳለመከተው ከ7 ሚሊዮን በላይ ኢትዮጵያውያን በምግብ ለስራ ታቅፈው ከአለም ባንክና ከአውሮፓ ህብረት በሚለገስ ስንዴ እየተደጎሙ ነው። በዚህ አመት የአስቸኳይ ምግብ እርዳታ የሚፈልጉ ኢትዮጵያውያን ቁጥር ከፍ ሊል እንደሚችል ባለሙያዎች ይናገራሉ።
በመላው አገሪቱ ከፍተኛ የሆነ የውሀ እና የምግብ እጥረት ቢከሰተም ገዢው ሀይል በቅርቡ 200 ሚሊዮን ብር በማውጣት የብሄር ብሄረሰቦችን በአል አክብሮአል። ከ150 ሚሊዮን ብር በላይ በማውጣት ደግሞ የመከላከያ ቀንን አክብሮአል።

Thursday, 21 March 2013

የወያኔ ካድሬዎች ሳውዲ አረቢያ ላይ ለሁለተኛ ግዜ በኢትዮጵያውያን ሙስሊሞች ድል ተደረጉ !!

የወያኔ ካድሬዎች ሳውዲ አረቢያ ላይ ለሁለተኛ ግዜ በኢትዮጵያውያን ሙስሊሞች ድል ተደረጉ !!

በአባይ ግድብ ሸፋን ወያኔንን ማጠናከሪያ የገቢ ማሰባሰቢያ ፕሮግራም ለማስፈጸም ትላንት ጅዳ ላይ በአባሳደር ዘነበ ከበደ የተጠራው የዐማራ ልማት ማህበር ስብሰባ በተሰብሳቢው ተቃውሞ በውርደት ተበተነ ።
የጅዳው አምባሳደራችን አቶ ዘነበ ከበደ በለመዱት የመከፋፈል ዘይቤያቸው በዛሬው ምሽት የአማራ ክልል ተወላጆችን ሰብስበው ነበር::ይህ ጽሁፍ መዘጋጀት ከመጀመሩ የተወሰኑ ደቂቃዎች በፊት የተጠናቀቀው ስብሰባ ከዚህ በፊት ከተካሄዱት ባልተለየ መልኩ አምባሳደሩ የልማት ዲስኩራቸውን ሊያስተጋቡበት የታቀደ ነው::ስብሰባውን የጠሩበት ምክንያት ለትውውቅ እንደሆነ ከጠቆሙ በኋላ ከሰሞኑ ሳዑዲ አረቢያ ውስጥ ዜጎቻችን በተመለከተ እየሆነ ያለው እንዳሳዘናቸው ሀገራችን ድሀ ባትሆን እንደዚህ ባልተዋረድን ብለው የአዞ እንባ አንብተዋል::ከሀገራችን ድህነት በላይ የኢህአዴግ ስልጣን ላይ መቀመጥ ችግራችን መሆኑን ዘንግተውት አይመስለንም::
ሰውየው ርቱዕ በሆነ አንደበታቸው ተሰብሳቢውን ባሰመሩለት ቀለበት እንዳጠመዱት ከገመቱ በኋላ ቤቱ ሀሳብ እንዲሰጥ እድሉን ሰጡ::የመጀመሪያውን የመናገር እድል ያገኘው ወጣት የሀይማኖት ሰው የአምባሳደሩን ድፎ ሊጥ አደረገባቸው::”….ክቡር አምባሳደር በርግጥ እርስዎ እንዳሉት ሀገር በልማት መበልጸጓ አስፈላጊነቱ አነጋጋሪ አይደለም::የልማቱም ሁኔታም እንዲሁ ነገር ግን ሰላማዊ ወገኖቻችን የእምነት ነፃነታቸው ተገፎ በግፍ እያሰቃየ ከሚገኘው ኢህአዴግ ጋር እንዴት ስለልማት ማሰብና ማውራት ይቻላል?እንዴት አድርገን ነው ወንድሞቻችን በየእስር ቤቱ እየማቀቁ እኛ ስለሀገር ብልጽግና ልንወያይ የምንደፍረው?…” ብሎ ሲናገር አምባሳደሩ አቋረጡት”…ይህ ነጥብ ከመወያያ አጀንዳችን ውጭ ነው::ስለዚህ ጉዳይ አንድ ራሱን የቻለ ስብሰባ ጠርተን ከተመረጡ የሀይማኖት አባቶችና ሌሎች ግለሰቦች ለመወያየት እቅድ ተይዞለታል::”አቶ ዘነበ ማጠቃለላቸውን አይቶ ወጣቱ ቀጠለ”…በመሰረቱ እኔ ከአጀንዳው አልወጣሁም፥የምንወያየው ስለልማት እንደመሆኑ ልማት ከመወሳቱ መቅደም ስላለበት ሰላም ነው እያወራሁ ያለሁት፥አሁንም ማለት የምፈልገው ከልማት ቅድሚያ የሰላም መሰረት የሆነው የሙስሊሙ መብት ይከበር::”
ሌላ ተናጋሪ ተከተሉ”…አምባሳደራችን ስለልማት ያነሱትን በጥሞና አድምጠኖታል::ጥሩ ነው::ነገር ግን ከልማትም ከብልጽግናም ከሀገርም በፊት ኢስላም ይቀድማል!”ብለው መጨረሻውን ነገሯቸው::”…ኢነ ሰላቲ ወኑሱኪ ወመህያያ ወመማቲ ሊላሂ ረበል አለሚን!” አስከተሉ ጀግናው”…እኛ ሙስሊሞች የምንኖረው ለኢስላም ነው!ሁሉን እንቀበላለን ሁሉን እንሸከማለን፥በዲናችን የመጣብንን ግን በፍጹም አንታገስም!የሰኡዲ አረቢያ ነዋሪዎች በልማቱም በጦርነቱም ስንተባበር ኖረናል፥አሁን መንግስት በአይናችን በዲናችን መጥቷል::መሸነጋገል አያስፈልግም::ከሁሉ በፊት መብታችን ይከበር!”ብለው ተቀመጡ::
አዳራሹ ውስጥ ተበታትነው ከተቀመጡ ሆድ አደር ካድሬዎች ሁለቱ የተለየ የውይይት ሀሳብ አቅርበው አጀንዳ በማስቀየር አምባሳደሩ ትንፋሽ የሚሰበስቡበት ፋታ እንዲያገኙ ረዷቸው::ይህም አላዋጣ ሌላ ወንድም ተነስቶ እቅዳቸውን አኮላሸ!”…እኛ ሀገራችን በልጽጋ ልጆቻችን ወደ ሀገር ልከን እንዲኖሩልን እንፈልጋለን::ነገር ግን እንኳን ልጆቻችን ልንልክ መልእታችን ሊያደርሱ የወከልናቸው የሰላም አምባሳደሮቻችን አስራችሁብናል::በዚህ አይነት እንዴት ስለልማት ማውራት አይገባም::በቅድሚያ ሀገር ሰላም ስጡ!ልማቱ ከዚያ ወዲያ የምንነጋገርበት ይሆናል::”ብል ተቀመጠ::
“የተለየ ሀሳብ ከሌለ ይህን አጀንዳ አላስተናግድም”ብለው ላኮረፉት አምባሳደር አንድ ወንድም “የተለየ ጥያቄ አለኝ”አላቸው::”ጠይቅ”አሉት “ልማት የሚለማው ለማን ነው?”አላቸው ለአምባሳደሩ ፊታቸውን አጥቁረው ዝም አሉት”ለህዝብ ነው አይደል?!”ራሱ ቀጠለ”ታዲያ ለህዝብ ከልማት መቅደም ያለበት ሰላም እኮ ነው!”ድንቅ አባባል!
ለጉድ የላካቸው አምባሳደር ግራ ቀኙን በተማጽኖ እየቃኙ”…ቅድም እንዳስቀመጥኩላችሁ በዚህ ወይም በሚቀጥለው ሳምንት በናንተው የተወከሉ የተወሰኑ የሀይማኖት አባቶችና ግለሰቦች የሚሳተፉበት ውይይት ይኖረናል::በዚሁ ወቅት ሀገር ስላለው ሁኔታ(የሙስሊሙ የመብት ጥያቄ ማለት አልደፈሩም) እንወያያለን::” በማለት ስብሰባውን አጠቃለው የሽንፈት ባርኔጣቸውን በማጥለቅ ከመድረኩ ተስፈንጥረው ወርደዋል!
ኢስላማዊ መብታችን ተከብሮ በሀገራችን እንደሙሉ ዜጋ እስከምንኖርባት የመጨረሻዋ ሰከንድ ሰላማዊ የመብት ትግላችን በአላህ እርዳታ ተጠናክሮ ይቀጥላል!ኢንሻ አላህ!